YA ILAHI HAR JAGAH
Ya Ilahi har jagaah Teri Ataa ka saath ho
Jab pade mushkil shahe mushkil kusha ka saath ho
Ya Ilahi bhool jaooñ naz’a ki takleef ko
Shaadi e deedar e husn e Mustafa ka saath ho
Ya Ilahi gor e teera ki jab aaye sakht raat
Un ke pyaare muñh ki subhe jaañfiza ka saath ho
Ya Ilahi jab pade mehshar meiñ shor e daarogeer
Amn dene wale pyaare peshwa ka saath ho
Ya Ilahi jab zubaneiñ baahar aayeiñ pyaas se
Saahib e Kausar shah e Jood o Ataa ka saath ho
Ya Ilahi sard mohri par ho jab khursheed e hashr
Sayyid e bey saaya ke zill e liwa ka saath ho
Ya Ilahi garmi e mehshar se jab bhadkeiñ badan
Daaman e mehboob ki thandi hawaa ka saath ho
Ya Ilahi naama e Aamaal jab khulne lageiñ
Aib posh e khalq sattaar e khata ka saath ho
Ya Ilahi jab baheiñ aañkheiñ hisaab e jurm meiñ
Un tabassum rez hoñtoñ ki dua ka saath ho
Ya Ilahi jab hisaab e khanda e be ja rulaye
Chashm e giryaan e shafee e Murtaja ka saath ho
Ya Ilahi rang laayeiñ jab meri be baakiyaañ
Un ki neechi neechi nazroñ ki hayaa ka saath ho
Ya Ilahi jab chalooñ taareek raahe pul siraat
Aftaab e haashmi noorul huda ka saath ho
Ya Ilahi jab sare shamsheer par chalna pade
Rabbe Sallim kehne waale gamzuda ka saath ho
Ya Ilahi jo duaeiñ nek hum tujh se kareiñ
Qudsiyoñ ke lab se aameeñ rabbana ka saath ho
