WOH SARWARE KISHWAR E RISAALAT

 

Wo sarware kishware Risaalat jo arsh par jalwagar huwe the
Naye nirale tarab ke saamaañ Arab ke mehmaan ke liye the

 

Bahaar hai shaadiyaañ mubarak chaman ko aabaadiyaañ mubarak
Malak falak apni apni lai meiñ ye ghur Anaadil ka boltey the

 

Wahaañ falak par yahaañ zameeñ meiñ rachi thi shaadi machi thi dhoomeiñ
Udhar se anwaar hañste aate idhar se nafhaat uth rahe the

 

Ye Chhoot padti thi un ke rukh ki ke arsh tak chaañdni thi chatki
Wo raat kya jagmaga rahi thi jagah jagah nasb aaine the

 

Nayi dulhan ki phaban meiñ ka’aba nikhar ke sañvra sañvar ke nikhra
Hajar ke sadqe kamar ke ek til meiñ rañg laakhoñ banaav ke the

 

Ye Jhooma meezaabe zar ka jhoomar ke aa raha kaan par dhalak kar
Phuhaar barsi to moti jhadkar hateem ki goad meiñ bhare the

 

Gubaar ban kar nisaar jaayeiñ kahaañ ab us rahguzar ko paayeiñ
Hamaare dil hooriyoñ ki aañkheiñ farishtoñ ke par jahaañ bichhe the

 

Khuda hi de sabr jaan e pur gam dikhaooñ kyuñkar tujhe wo aalam
Jab un ko jhurmut meiñ le ke qudsi jinaañ ka doolha banaa rahe the

Utaar kar un ke rukh ka sadqa ye noor ka bat raha tha baada
Ke chañd sooraj machal machal kar jabeeñ ki khairaat maañgte the

 

Wahi to ab tak chhalak raha hai wahi to joban tapak raha hai
Nahaane meiñ jo gira tha paani katorey taroñ ne bhar liye the

 

Bacha jo talwon ka un ke dhowan banaa wo jannat ka rang o rogan
Jinhoñ ne doolha ki paai utran wo phool gulzaare noor ke the

 

Tajalli-e-haq ka sehra sar par salaat o tasleem ki nichhawar
Do ruye qudsi pare jamaakar khade salami ke waaste the

 

Jo hum bhi waañ hote khaak e gulshan lipat ke qadmoñ se lete utran
Magar kareiñ kya naseeb meiñ to ye naa muradi ke din likhe the

 

Hujoom e Ummeed hai ghataao muraadeiñ dekar inheiñ hataao
Adab ki baageiñ liye badhaao malaaika meiñ ye galgale the

 

Uthi jo garde rahe munawwar wo noor barsa ke raaste bhar
Ghire the badal bhare the jal thal umand ke jungle ubal rahe the

 

Buraaq ke naqsh sum ke sadqe wo gul khilaaye ke saare raste
Mahekte gulban lahekte gulshan hare bhare lehlahaa rahe the

 

Namaaz e Aqsa meiñ tha yahi sir ayaañ ho maa’ni e awwal aakhir
Ke dast bastaa haiñ peechhe haazir jo sultanat aagey kar gaye the

 

Ye unki aamad ka dabdaba tha nikhaar har shaye ka ho raha tha
Nujoom o aflaak jaam o meena ujaalte the khañgaalte the

 

Naqaab ulte wo mehr e anwar jalaal e rukhsaar garmiyoñ par
Falak ko haibat se tap chadhi thi tapakte anjum ke aabley the

 

Badha ye lehra ke behr e wehdat ke dhul gaya naam reg e kasrat
Falak ke teeloñ ki kya haqeeqat ye arsh o kursi do bulbule the

 

Chala wo sar wa chimañ kharamañ na ruk saka sidrah se bhi daamaañ
Palak jhapakti rahi wo kab ke sab ein o aañ se guzar chuke the

 

Jhalak si ek qudsiyoñ par aayi hawa bhi daaman ki phir na payi
Sawaari doolha ki door pahuñchi baraat meiñ hosh hi gaye the

 

Thake the roohul ameeñ ke baazu chhuta wo daaman kahaañ wo pehlu
Rikaab chhooti ummid tooti Nigaah e hasrat ke walwale the

 

Rawish ki garmi ko jis ne socha dimaag se ik bhabooka phoota
Khirad ke jungle meiñ phool chamka dahar dahar ped jal rahe the

 

Jilo meiñ jo murge aql ude the ajab bure haaloñ girte padte
Wo sidrah hi par rahe the thak kar chadha tha dum tewar aa gaye the

 

Jhuka tha mujre ko arsh e aala gire the sajde meiñ bazm e baala
Ye Aañkheiñ qadmoñ se mal raha tha wo gird qurbaan ho rahe the

 

Ziyaeñ kuchh arsh par ye aayiñ ke saari qandeelaiñ jhilmilayeiñ
Huzoor e khursheed kya chamakte charaag muñh apna dekhte the

 

Yahi samaañ tha ke paik e rehmat khabar ye laaya ke chaliye Hazrat
Tumhari khaatir kushaada haiñ jo Kaleem par band raaste the

 

Badh aye Mohammed Qareeñ ho Ahmed Qareeb aa Sarwar e Mumajjad
Nisaar jaaoñ ye kya nida thi ye kya samaañ tha ye kya maz’e the

 

Tabarakallaah shaan Teri tujhi ko zeba hai be niyaazi
Kahiñ to wo josh e Lan Taraani kaheeñ taqaaze wisaal ke the

 

Khirad se keh do ke sar jhukale gumaañ se guzre guzarne wale
Pade haiñ yaañ khud jehat ko laaley kise bataaye kidhar gaye the

 

Suraage ein o mataa kahaañ tha nishaan e kaif o ila kahaañ tha
Na koi raahi na koi saathi na sang e manzil na marhale the

 

Udhar se paiham taqaaze aana Idhar tha mushkil qadam badhana
Jalal o haibat ka saamna tha jamaal o rehmat ubhaarte the

 

Badhe to lekin jhijhakte darte haya se jhukte adab se rukte
Jo qurb unheeñ ki rawish pe rakhte to laakhoñ manzil ke faasle the

 

Par un ka badhna to naam ko tha haqiqatan fe’l tha udhar ka
Tanazzuloñ meiñ taraqqi afza Dana Tadalla ke silsile the

 

Huwa na aakhir ke ek bajraa tamooj e behr e hu meiñ ubhra
Danaa ki goadi meiñ un ko lekar fanaa ke langar utha diye the

 

Kise miley ghaat ka kinara kidhar se guzra kahaañ utara
Bhara jo misl e nazar tarara wo apni aañkhoñ se khud chhupe the

 

Uthe jo qasr e danaa ke parde koi khabar de to kya khabar de
Wahaañ to jaa hi nahiñ dui ki na keh ke wo bhi na the arey the

 

Wo baag kuchh aisa rang laaya ke guncha wo gul ka farq uthaaya
Girah meiñ kaliyoñ ki baag phoole guloñ ke tukme lage huwe the

 

Muheet o markaz meiñ farq mushkil rahe na faasil khutoot waasil
kamaaneiñ hairat meiñ sar jhukaaye ajeeb chakkar meiñ daairey the

 

Hijaab uthne meiñ laakhoñ parde har ek parde meiñ laakhoñ jalwe
Ajab ghadi thi ke wasl o furqat janam ke bichhde galey mile the

 

Zabaaneiñ sookhi dikhakhe maujeiñ tadap rahi theiñ ke paani paayeiñ
Bhañvar ko ye zauf tishnagi tha ke halqe aañkhoñ meiñ pad gaye the

 

Wahi hai Awwal wahi hai Aakhir wahi hai Baatin wahi hai Zaahir

Usi ke jalwe usi se milne usi se us ki taraf gaye the

 

Kamaan e imkaañ ke jhoote nuqto tum Awwal Aakhir ke pher meiñ ho
Muheet ki chaal se to poochho kidhar se aaye kidhar gaye the

 

Udhar se theiñ nazr sheh namaazeiñ Idhar se in’aame khusrawi meiñ
Salaam o rehmat ke haar gundh kar guluye pur noor meiñ pade the

 

Zubaan ko intezaar e guftan to gosh ko hasrat e shuneedan
Yahaañ jo kehna tha keh liya tha jo baat sunni thi sun chuke the

 

Wo burj e bat-ha ka maah paara bahisht ki sair ko sidhaara
Chamak pe tha khuld ka sitara ke is qamar ke qadam gaye the

 

Tarab ki naazish ke haañ lachakiye adab wo bandish ke hil na sakiye
Ye Josh e Ziddain tha ke paude kusha kashe Arrah ke taley the

 

Khuda ki qudrat ke chaañd haq ke karoroñ manzil meiñ jalwa kar ke
Abhi na taaroñ ki chhauñ badli ke noor ke tadke aa liye the

 

Nabi e rehmat shafi e ummat RAZA pe lillaah ho inaayat
Ise bhi un khil’atoñ se hissa jo khaas rehmat ke waañ bate the

 

Sana e Sarkaar hai Wazeefa Qubool e Sarkaar hai Tamanna
Na shaayeri ki hawas na parwa rawi thi kya kaise qaafiye the