UTHA DO PARDA DIKHA DO CHEHRA
Utha do parda dikha do Chehra ke Noor e baari Hijaab meiñ hai
Zamana Taareek ho raha hai ke Mehr kab se Naqaab meiñ hai
Jali Jali bu se us ki paida hai sozishe ishq e chashm e wala
Kabaabe Aahu meiñ bhi na paya mazaa jo dil ke kabaab meiñ hai
Unhiñ ki boo maaya e saman hai unhiñ ka jalwa chaman chaman hai
Unhiñ se gulshan mahek rahe haiñ unhiñ ki rangat gulaab meiñ hai
Wo gul haiñ labhaaye nazuk un ke hazaaroñ jhadte haiñ phool jin se
Gulaab gulshan meiñ dekhe bulbul ye dekh gulshan gulaab meiñ hai
Khade haiñ Munkar Nakeer sar par na koi haami na koi yaawar
Bataado aakar mere payamber ke sakht mushkil jawaab meiñ hai
Khudaye qahhaar hai gazab par khule haiñ badkaariyoñ ke daftar
Bachalo aakar shafee e Mehshar tumhara banda azaab meiñ hai
Kareem aisa mila ke jis ke khule haiñ haath aur bhare khazaane
Batao aye mufliso! ke phir kyuñ tumhara dil iztiraab meiñ hai
