TUM PAR SALAAM HAR DUM
Aye deen e haq ke rehbar Tum par Salaam har dum
Mere shafee‘e mehshar Tum par Salaam har dum
Is bekas o hazeeñ par jo kuchh guzar rahi hai
Zaahir hai sab wo tumpar Tum par Salaam har dum
Duniya o aakhirat meiñ jab maiñ rahooñ salaamat
Pyaare padhooñ na kyuñkar Tum par Salaam har dum
Banda tumhare dar ka aafat meiñ mubtala hai
Rehm aye Habeeb e daawar Tum par Salaam har dum
Lillaah ab hamaari fariyaad ko pahuñchiye
Be had hai haal abtar Tum par Salaam har dum
Koi nahiñ hai mera maiñ kis se daad chahooñ
Sultaane banda parwar Tum par Salaam har dum
Bulwaake apne dar par ab mujh ko dije izzat
Phirta huñ khwaar dar dar Tum par Salaam har dum
Mohtaaj se tumhaare karte haiñ sab kinaara
Bas ek tumheiñ ho yaawar Tum par Salaam har dum
Koi nahiñ hamara hum kis ke dar pe jayeiñ
Aye bekasoñ ke yaawar Tum par Salaam har dum
