SUNTE HAIÑ KE MEHSHAR MEIÑ
Sunte haiñ ke Mehshar meiñ sirf Un ki Rasaai hai
Gar un ki rasaai hai lo jab to ban aai hai
Machla hai ke rehmat ne ummid bandhaai hai
Kya baat teri mujrim kya baat banaai hai
Sab ne safey mehshar meiñ lalkaar diya humko
Aye bekasoñ ke Aaqa ab teri duhaai hai
Yuñ to sab unhiñ ka hai par dil ki agar puchho
Ye toote huwe dil hi khaas un ki kamaai hai
Baazaar e amal meiñ to sauda na bana apna
Sarkaar karam tujh meiñ aibi ki samaai hai
Girte huwoñ ko muzda Sajde meiñ girey Maula
Ro ro ke shafa’at ki tamheed uthaai hai
Aye dil ye sulagna kya jalna hai to jal bhi uth
Dum ghutne laga zaalim kya dhooni ramaai hai
Mujrim ko na sharmao ehbaab kafan dhak do
Muñh dekh ke kya hoga parde meiñ bhalaai hai
Ab aap hi sambhaaleiñ to kaam apne sambhal jaayeiñ
Hum ne to kamaai sab kheloñ meiñ gañwaai hai
Aye Ishq tere sadqe jalne se chhute saste
Jo Aag bujha degi wo Aag lagaayi hai
Taiba na sahi afzal Makka hi bada zaahid
Hum Ishq ke bande haiñ kyuñ baat badhaai hai
