SHUKRE KHUDA KE AAJ GHADI
Shukr e Khuda ke aaj ghadi us safar ki hai
Jis par nisaar jaan falaah o zafar ki hai
Garmi hai tap hai dard hai kulfat safar ki hai
Na Shukr ye to dekh azeemat kidhar ki hai
Hum ko to apne saaye meiñ aaraam hi se laaye
Heeley bahaane waaloñ ko ye raah dar ki hai
Lut-te haiñ maare jaate haiñ yuñ hi suna kiye
Har baar di wo amn ke gairat hazar ki hai
Maahe Madina apni tajalli ataa kare
Ye dhalti chaañdni to pahar dopahar ki hai
Us ke tufail haj bhi khuda ne kara diye
Asl e muraad haazri us paak dar ki hai
Ka’aba ka naam tak na liya taiba hi kaha
Poochha tha hum se jis ne ke nuhzat kidhar ki hai
Ka’aba bhi hai unhiñ ki tajalli ka ek zill
Roshan unhiñ ke aks se putli hajar ki hai
Hote kahaañ khaleel o bina ka’aba wo mina
Laulaak wale Saahibi sab tere ghar ki hai
Maula Ali ne waari teri neeñd par namaaz
Aur wo bhi asr sab se jo a’ala khatar ki hai
Siddique balke gaar meiñ Jaañ us pe de chuke
Aur hifz e jaañ to jaan furoz e Gurar ki hai
Haañ tuney un ko jaan unheiñ pher di namaaz
par wo to kar chuke the jo karni bashar ki hai
Saabit huwa ke jumla faraiz furoo’a haiñ
Aslul usool bandagi us taajwar ki hai
Mujrim bulaye aaye haiñ Jaooka hai gawaah
Phir rad ho kab ye shaan karimoñ ke dar ki hai
Bad haiñ magar unhiñ ke haiñ baagi nahiñ haiñ hum
Najdi na aaye us ko ye manzil khatar ki hai
Tuf najdiyat na kufr na Islaam sab pe harf
Kaafir idhar ki hai na udhar ki adhar ki hai
Haakim hakeem daad o dawa deiñ ye kuchh na deiñ
Mardood ye muraad kis aayat khabar ki hai
Noor e Ilaah kya hai Mohabbat Habeeb ki
Jis dil meiñ ye na ho wo jaga Khook o khar ki hai
Zikr e Khuda jo un se juda chaaho najdiyo!
Wallaah zikr e haq nahiñ kunji saqar ki hai
Be un ke wasta ke khuda kuchh ataa kare
Haashaa galat galat ye hawas be basar ki hai
Jinn o Bashar salaam ko haazir haiñ Assalaam
Ye baargaahe maalike jinn o bashar ki hai
Shams o Qamar Salaam ko haazir haiñ Assalaam
Khubi unhiñ ki jot se shams o qamar ki hai
Khasta Jigar Salaam ko haazir haiñ Assalaam
Marham yahiñ ki khaak to khasta jigar ki hai
Ehle Nazar salaam ko haazir haiñ Assalaam
Ye gard hi to surma sab ehle nazar ki hai
Ye pyari pyari kyari tere khaana baag ki
Sard is ki aab o taab se aatish saqar ki hai
Jannat meiñ aake naar meiñ jaata nahiñ koi
Shukr e khuda nawed najaat o zafar ki hai
Maañ donoñ bhai bete bhatije azeez dost
Sab tujhko soñpe milk hi sab tere ghar ki hai
Jin jin muraadoñ ke liye ehbaab ne kaha
Pesh khabeer kya mujhe haajat khabar ki hai
Be maañge dene wale ki ne’amat meiñ garq haiñ
Maañge se jo miley kise fehm is qadar ki hai
Ya Rab RAZA na Ahmed e pareena hoke jaye
Ye baargaah tere habeeb e abar ki hai
