RUKH DIN HAI YA MEHR E SAMAA
Rukh din hai ya mehr e samaa ye bhi nahiñ wo bhi nahiñ
Shab zulf ya mushk e khuta ye bhi nahiñ wo bhi nahiñ
Mumkin meiñ ye qudrat kahaañ waajib mein abdiyat kahaañ
Hairaañ hooñ ye bhi hai khataa ye bhi nahiñ wo bhi nahiñ
Haq ye ke haiñ abd e ilaah aur aalam e imkaañ ke shaah
Barzakh haiñ wo sirre khuda ye bhi nahiñ wo bhi nahiñ
Bulbul ne gul un ko kaha qumri ne sarwe jaañ fiza
Hairat ne jhunjhlakar kaha ye bhi nahiñ wo bhi nahiñ
Khursheed tha kis zor par kya badh ke chamka tha qamar
Be parda jab wo rukh huwa ye bhi nahiñ wo bhi nahiñ
Dar tha ke isyaañ ki sazaa ab hogi ya roz e jazaa
Di unki rehmat ne sadaa ye bhi nahiñ wo bhi nahiñ
Koi hai naazaañ zohad par ya husn e tauba hai sipar
Yaañ hai faqat teri ataa ye bhi nahiñ wo bhi nahiñ
Din lahw meiñ khona tujhe shab subh tak sona tujhe
Sharm e nabi khauf e khuda ye bhi nahiñ wo bhi nahiñ
Rizq e khuda khaaya kiya farmaan e haq taala kiya
Shukr e karam tars e sazaa ye bhi nahiñ wo bhi nahiñ
