PUL SE UTAARO RAAH GUZAR KO
Pul se utaaro raah guzar ko khabar na ho
Jibreel par bichaeiñ to par ko khabar na ho
Kaañta mere jigar se gam e rozgaar ka
Yuñ kheeñch lijiye ke jigar ko khabar na ho
Faryaad ummati jo kare haal e zaar meiñ
Mumkin nahiñ ke khair e bashar ko khabar na ho
Kehti thi ye buraaq se us ki subuk rawi
Yuñ jaaiye ke garde safar ko khabar na ho
Farmaate haiñ ye donoñ haiñ sardaar e do jahaañ
Aye Murtaza! Ateeq o Umar ko khabar na ho
Aisa gumaa de un ki vila meiñ khuda hameiñ
Dhoondha karey par apni khabar ko khabar na ho
Aye khaar e taiba dekh ke daaman na bheeg jaye
Yuñ dil meiñ aa ke deeda e tar ko khabar na ho
Aye shoqe dil ye sajda gar un ko rawaa nahiñ
Achha wo sajda kijiye ke sar ko khabar na ho
