NA HO AARAAM JIS BEEMAAR KO
Na ho aaraam jis beemaar ko saare zamaane se
Utha le jaaye thodi khaak un ke aastaane se
Tumhaare dar ke tukdoñ se pada palta hai ek Aalam
Guzaaraa sab ka hota hai isi mohtaaj khaane se
Shab e Asra ke dulha par nichhaawar hone waali thi
Nahiñ to kya garaz thi itni jaanoñ ke banaane se
Koi firdaus ho ya khuld ho hum ko garaz matlab
Lagaaya ab to bistar aap hi ke aastaane se
Na kyuñ un ki taraf Allah sau sau pyar se dekhe
Jo apni aañkheiñ malte haiñ tumhare aastaane se
Tumhaare to wo ehsaañ aur ye naafarmaaniyaañ apni
Hameiñ to sharm si aati hai tumko munh dikhaane se
Zameeñ thodi si dede behr e madfan apne kuche meiñ
Lagaa de mere pyaare meri mitti bhi thikaane se
Palat-ta hai jo zaa‘ir us se kehta hai naseeb us ka
Arey gaafil qazaa behtar hai yaañ se phir ke jaane se
Bulaalo apne dar par ab to hum khaana badoshoñ ko
Phireñ kab tak zalil o khwaar dar dar be thikaane se
