KYA HI ZAUQ AFZA SHAFA’AT HAI
TUMHARI WAH WAH
Kya hi zauq afza shafa’at hai Tumhari wah wah
Qarz leti hai gunaah parhezgaari wah wah
Khaama e qudrat ka husn e dast kaari wah wah
Kya hi tasveer apne pyaare ki sañwaari wah wah
Ungliyaañ haiñ faiz par toote haiñ pyase jhoom kar
Nadiyaañ panj aab e rehmat ki haiñ jaari wah wah
Noor ki khairaat lene daud-te haiñ mehr o maah
Uth-ti hai kis shaan se gard e sawaari wah wah
Nafs ye kya zulm hai jab dekho taaza jurm hai
Naatawaañ ke sar par itna bojh bhaari wah wah
Mujrimoñ ko dhoondti phirti hai rehmat ki nigaah
Taala e bargashta teri saazgaari wah wah
Kya Madina se saba aayi ke phooloñ meiñ hai aaj
Kuchh nayi boo bhini bhini pyari pyari wah wah
Is taraf rauze ka noor us samt mimbar ki bahaar
Beech meiñ jannat ki pyari pyari kyari wah wah
Sadqe is in’aam ke qurbaan is ikraam ke
Ho rahi hai dono aalam meiñ tumhari wah wah
