DIL MEIÑ HO YAAD TERI
GOSHA E TANHAAI HO
Dil meiñ ho yaad teri gosha e tanhaai ho
Phir to khalwat meiñ ajab anjuman aaraai ho
Aastaane pe tere sar ho ajal aayi ho
Aur aye jaane jaahaañ tu bhi tamaashaai ho
Uski qismat pe fida takht e shahi ki raahat
Khaak e taiba pe jise chain ki neend aayi ho
Ek jhalak dekhne ki taab nahiñ aalam ko
Wo agar jalwa kare kaun tamaashaai ho
Aaj jo aib kisi par nahiñ khulne dete
Kab wo chaahenge meri hashr meiñ ruswaai ho
Yahi manzoor tha Qudrat ko ke saaya na bane
Aise yakta ke liye aisi hi yaktaai ho
Jab uthe dast e ajal se meri hasti ka hijaab
Kaash us parda ke andar teri zebaai ho
Kabhi aisa na huwa un ke karam ke sadqe
Haath ke phailne se pehle na bheek aayi ho
