BHEENI SUHAANI SUBH MEIÑ
Bheeni suhaani subh meiñ thandak jigar ki hai
Kaliyaañ khileeñ diloñ ki hawaa ye kidhar ki hai
Daaleiñ hari hari haiñ to baaleiñ bhari bhari
Kusht e amal pari hai ye baarish kidhar ki hai
Hum jaayeiñ aur qadam se lipat kar haram kahe
Soñpa khuda ko ye Azmat kis safar ki hai
Hum gird e ka’aba phirte the kal tak aur aaj woh
Hum par nisaar hai ye Iraadat kidhar ki hai
Kaalik jabeeñ ki sajda e dar se chhudaoge
Mujh ko bhi le chalo ye tamanna hajar ki hai
Dooba huwa hai shauq meiñ zamzam aur aañkh se
Jhaale baras rahe haiñ ye hasrat kidhar ki hai
Barsa ke jaane waloñ pe gohar karooñ nisaar
Abr e Karam se arz ye meezaab e zar ki hai
Aagosh e shauq khole haiñ jin ke liye hateem
Wo phir ke dekhte nahiñ ye dhun kidhar ki hai
Haañ haañ rahe Madina hai gaafil zaraa tu jaag
O paoñ rakhne wale ye jaa chashm o sar ki hai
Waaruñ qadam qadam pe ke har dam hai jaan-e-nav
Ye raahe jaañ fiza mere maula ke dar ki hai
Ghadiyaañ gini haiñ barsoñ ki ye subghadi phiri
Mar mar ke phir ye sil mere seeney se sar ki hai
Allahu Akbar apne qadam aur ye khaake paak
Hasrat malaika ko jahaañ waza’ e sar ki hai
Me’araj ka samaañ hai kahaañ pahuñche zaairo
Kursi se ooñchi kursi usi paak ghar ki hai
Ushhaaq e rouza sajda meiñ soo e haram jhuke
Allah jaanta hai ke niyyat kidhar ki hai
Ye ghar ye dar hai us ka jo ghar dar se paak hai
Muzda ho be gharo ke sila achhe ghar ki hai
Mehboob e Rabbe arsh hai is sabz qubba meiñ
Pehlu meiñ jalwa gaah Ateeq o Umar ki hai
Sa’adain ka qiraan hai pehlu e maah meiñ
Jhurmut kiye haiñ taare tajalli qamar ki hai
Sattar Hazaar Subh haiñ sattar hazaar shaam
Yuñ bandagi e zulf o rukh aathoñ paher ki hai
Jo ek baar aaye dobara na aayeñge
Rukhsat hi baargaah se bas is qadar ki hai
Tadpa kareiñ badal ke phir aana kahaañ naseeb
Be hukm kab majaal parinde ko par ki hai
Ye badliyañ na hoñ to karodoñ ki aas jaaye
Aur baargaah marhamate aam tar ki hai
Masoomoñ ko hai umr meiñ sirf ek baar baar
Aaasi pade reheiñ to sila umr bhar ki hai
Zinda raheiñ to haazri e baargaah naseeb
Mar jaayeiñ to hayaat e abad aish ghar ki hai
Itna ajab bulandi e jannat pe kis liye
Dekha nahiñ ke bheek ye kis uñche ghar ki hai
Arsh e bareeñ pe kyuñ na ho firdaus ka dimaag
Utri huwi shabeeh tere baam o dar ki hai
Wo Khuld jis me utregi Abraar ki baraat
Adna nichhaawar us mere doolha ke sar ki hai
Amber zameeñ abeer hawa mushk e tar gubaar
Adna si ye shanaakht teri rahguzar ki hai
Sarkaar hum gañwaaroñ me tarz e adab kahaañ
Hum ko to bas tameez yahi bheek bhar ki hai
Maañge ge maañge jayeñge muñh maañgi paayeñge
Sarkaar meiñ na la hai na haajat agar ki hai
Uf be hayaaiyaañ ke ye muñh aur tere Huzoor
Haañ tu kareem hai teri khu dar guzar ki hai
Tujh se chhupaooñ muñh to karooñ kis ke saamne
Kya aur bhi kisi se tawaqqo Nazar ki hai
Jaooñ kahaañ pukaarooñ kisey kis ka muñh takooñ
Kya purshish aur jaa bhi sag e be hunar ki hai
Lab waa haiñ aañkheiñ band haiñ phaili haiñ jholiyañ
Kitne mazey ki bheek tere paak dar ki hai
Jannat na deiñ na deiñ teri rooyat ho khair se
Is gul ke aage kis ko hawas barg o bar ki hai
Sharbat na deiñ, na deiñ, to kare baat lutf se
Ye Shahed hai to phir kise parwa shakar ki hai
Maiñ khaana zaad kohna hooñ soorat likhi huwi
Bandoñ kaneezoñ meiñ mere maadar pidar ki hai
Mangtaa ka haath uth-te hi daata ki dain thi
Doori qubool o arz meiñ bas haath bhar ki hai
