BADAL YA FARD JO KAAMIL HAI
Badal ya fard jo kaamil hai Ya Gaus
Tere hi dar se mustakmil hai Ya Gaus
Jo teri yaad se zaahil hai Ya Gaus
Wo Zikrullah se gaafil hai Ya Gaus
Sukhan haiñ asfiya tu magz, ma’ana
Badan haiñ auliya tu dil hai Ya Gaus
Agar wo jism e Irfaañ haiñ to tu Aañkh
Agar wo aañkh haiñ tu til hai Ya Gaus
Uluhiyyat Nubuwwat ke siwa tu
Tamaam afzaal ka qaabil hai Ya Gaus
Nabi ke qadmoñ par hai juz Nubuwwat
Ke khatm is raah meiñ haail hai Ya Gaus
Uluhiyyat hi Ahmed ne na paayi
Nubuwwat hi se tu ‘aatil hai Ya Gaus
Sahabiyyat huwi phir Taab’iyyat
Bas aage Quadri manzil hai Ya Gaus
Hazaaroñ Taabi’ee se tu fazooñ hai
Wo tabqa mujmalan Faazil hai Ya Gaus
Ye Chishti Soharwardi Naqshbandi
Har ek teri taraf maa’il hai Ya Gaus
Teri chidiyaañ haiñ tera daana paani
Tera mela Teri mehfil hai Ya Gaus
Tere khuddaam ke aage hai ek baat
Jo aur aqtaab ko mushkil hai Ya Gaus
Sitam kori wahaabi raafzi ki
Ke hindu tak tera qaail hai Ya Gaus
Wo kya jaane ga Fazl e Murtaza ko
Jo tere fazl ka jaahil hai Ya Gaus
