ARSH E HAQ HAI
Arsh e haq hai masnad e rif’at Rasoolullah ki
Dekhni hai hashr meiñ Izzat Rasoolullah ki
Qabr meiñ lehraenge ta hashr chashme noor ke
Jalwa farma hogi jab Tal’at Rasoolullah ki
La wa rabbil arsh jis ko jo mila un se mila
Bat-ti hai kaunain meiñ Ne’amat Rasoolullah ki
Wo Jahannam meiñ gaya jo un se mustagni huwa
Hai Khalilullah ko Haajat Rasoolullah ki
Suraj ulte paoñ palte chaand ishaare se ho chaak
Andhe najdi dekh le Qudrat Rasoolullah ki
Tujh se aur jannat se kya matlab wahaabi door ho
Hum Rasoolullah ke Jannat Rasoolullah ki
Najdi us ne tujh ko mohlat di ke is aalam meiñ hai
Kaafir o murtad pe bhi Rehmat Rasoolullah ki
Hum bhikaari wo karim un ka khuda un se fazooñ
Aur na kehna nahiñ Aadat Rasoolullah ki
Ahlesunnat ka hai beda paar As’haab e Huzoor
Najm haiñ aur naav hai Itrat Rasoolullah ki
Khaak hokar Ishq meiñ aaraam se sona mila
Jaan ki akseer hai Ulfat Rasoolullah ki
Toot jayeñge gunah gaaroñ ke fauran qaid o band
Hashr ko khul jayegi Taaqat Rasoolullah ki
Ya Rab ik saa’at meiñ dhul jayeiñ siyaah kaaron ke jurm
Josh meiñ aa jaaye ab Rehmat Rasoolullah ki
