JAAN O DIL SE TUM PE MERI JAAN
QURBAAÑ GAUS E PAAK
Jaan o dil se tum pe meri jaan Qurbaañ Gaus e Paak
Hai Salaamat tum se mera deeno Imaañ Gaus e Paak
Maiñ tera adna bhikaari tu mera sultaan hai
Hai qasam Haq ki ye mera deeno Imaañ Gaus e Paak
Aap ki chashme karam ka ek ishaara ho agar
Do jahaañ ki mushkileiñ ho jaayeiñ aasaañ Gaus e Paak
Aap ka Naam-e-Muqaddas mere dil par naqsh hai
Meri Bakhshish ke liye kaafi hai saamaañ Gaus e Paak
Meri aankheiñ tera gumbad teri chaukhat mera sar
Mera laasha aur ho tera biyabaañ Gaus e Paak
Bheja tuney hi Moinuddin Chishti ko yahaañ
Hind meiñ tere sabab se haiñ Musalmaañ Gaus e Paak
Lut raha hai qaafila Baghdaad waale le khabar
Al madad Mehboob e Subhaañ Shaahe Jeelaañ Gaus e Paak
Hai kidhar aa dekh to bandoñ ki kya haalat huwi
Aye mere Baghdaad waale Shaahe Jeelaañ Gaus e Paak
Zaalimoñ ne zulm se bandoñ ko kar daala halaak
Al madad Baghdaad waale Shaahe Jeelaañ Gaus e Paak
Laaj waale Sunniyoñ ki laaj tere haath hai
Qaadiri Manzil ke doolha Shaahe Jeelaañ Gaus e Paak
Ho Raza par lutf tera hum par un ka lutf ho
Un ka daamaañ hum pe un par tera daamaañ Gaus e Paak
