YAAD MEIÑ JIS KI NAHIÑ
Yaad meiñ jis ki nahiñ hoshe tan o jaañ hum ko
Phir dikha de wo rukh aye mehr e farozaañ hum ko
Jis tabassum ne gulistaañ pe girayi bijli
Phir dikha de wo ada e gule khanda hum ko
Kaash aaweza e qandeel e madina ho wo dil
Jis ki sozish ne kiya rashk e charagaañ hum ko
Sham e Taiba se maiñ parwana rahooñ kab tak door
Haañ jala de sharar e aatish e pinhaañ hum ko
Khaak hojaayeñ dar e paak pe hasrat mit jaaye
Ya Ilahi na phira be sar o saamaañ hum ko
Tang aaye haiñ do aalam teri betaabi se
Chain lene de tap e seena e sozaañ hum ko
Mere har zakhm e jigar se ye nikalti hai sada
Aye maleeh e arabi kar de namakdaañ hum ko
