PESH E HAQ MUZDA SHAFA’AT
Pesh e Haq muzda shafa’at ka sunaate jaayenge
Aap rotey jaayenge hum ko hañsaate jaayenge
Dil nikal jaane ki jaa hai aah kin aañkhoñ se wo
Hum se pyaasoñ ke liye dariya bahaate jaayenge
Kushtagaan e garmi e mehshar ko wo jaan e maseeh
Aaj daaman ki hawaa dekar jilate jaayenge
Haan chalo hasrat zado sunte haiñ woh din aaj hai
Thi khabar jis ki ke wo jalwa dikhaate jaayenge
Aaj Eid e aashiqaañ hai gar khuda chaahe ke wo
abru e pewasta ka aalam dikhaate jaayenge
Kuchh khabar bhi hai faqeero aaj wo din hai ke wo
Ne’amate khuld apne sadqe meiñ lutaate jaayenge
Khaak uftaado bas un ke aane hi ki der hai
Khud wo girkar sajda meiñ tumko uthaate jaayenge
Wus’ateiñ di haiñ khuda ne daaman e mehboob ko
Jurm khulte jaayenge aur wo chhupaate jaayenge
Lo wo aaye muskuraate hum aseeroñ ki taraf
Khirmane isyaañ par ab bijli giraate jaayenge
Aañkh kholo gamzado dekho wo giryaañ aaye haiñ
Lohe dil se naqsh e gam ko ab mitaate jaayenge
Aftaab un ka hi chamke ga jab auroñ ke charaag
Sarsare joshe baala se jhilmilaate jaayenge
Paaye kubaañ pul se guzreñge teri aawaaz par
Rabb e Sallim ki sadaa par wajd laate jaayenge
Hashr tak daleiñge hum paida-ishe maula ki dhoom
Misl e faaras najd ke qil’ae giraate jaayenge
