KIS KE JALWE KI JHALAK
Kis ke jalwe ki jhalak hai ye ujala kya hai
Har taraf deeda e hairat zadaa takta kya hai
Maang mann maanti muñh maañgi muraadeiñ le ga
Na yahaañ”Na”hai na mangta se ye kehna “Kya hai”
Hum haiñ un ke wo haiñ tere to huwe hum tere
Is se badh kar teri simt aur waseela kya hai
Un ki ummat meiñ banaaya unheiñ rehmat bheja
Yuñ na farma ke tera rehm meiñ da’awa kya hai
Sadqa pyare ki hayaa ka ke na le mujh se hisaab
Bakhsh be poochhe lajaaye ko lajaana kya hai
Zaahid un ka maiñ gunahgaar wo mere shaaf’e
Itni nisbat mujhe kya kam hai tu samjha kya hai
Kaash fariyaad meri sun ke ye farmaeiñ Huzoor
Haañ koi dekho ye kya shor hai goga kya hai
Kaun aafat zadaa hai kis pe balaa tooti hai
Kis museebat meiñ giraftaar hai sadma kya hai
Kis se kehta hai ke Lillah khabar lije meri
Kyuñ hai betaab ye be chaini ka rona kya hai
Is ki be chaini se hai khatir e aqdas pe malaal
Be kasi kaisi hai poochho koi guzra kya hai
Yuñ malaik kareiñ ma’rooz ke ek mujrim hai
Is se pursish hai bataa toone kiya kya kya hai
Saamna qaher ka hai daftar e aamaal hai pesh
Dar raha hai ke Khuda hukm sunaata kya hai
Aap se karta hai fariyaad ke yaa Shahe Rusul
Banda bekas hai shaha rehm meiñ waqfa kya hai
Ab koi dum meiñ giraftaar e balaa hota hooñ
Aap aa jaayeiñ to kya khauf hai khatka kya hai
Sun ke ye arz meri behr e karam josh meiñ aaye
Yuñ malaaik ko ho irshaad thaherna kya hai
Kis ko tum morid e aafaat kiya chahte ho
Hum bhi to aake zara dekheiñ tamaasha kya hai
Un ki aawaz pe kar uthooñ maiñ besakhta shor
Aur tadap kar ye kahooñ ab mujhe parwa kya hai
Lo wo aaya mera haami mera gam khwaare umam
Aa gayi jaañ taney be jaañ meiñ ye aana kya hai
Phir mujhe daaman-e-aqdas meiñ chhupa leiñ sarwar
Aur farmaayeiñ hato is pe taqaaza kya hai
Banda aazaad shuda hai ye hamaare dar ka
Kaisa lete ho hisaab is pe tumhara kya hai
Chhod kar mujh ko farishte kaheiñ mehkoom haiñ hum
Hukm e waala ki na taameel ho zohra kya hai
Ye samaañ dekh ke mehshar meiñ uthe shor ke waah
Chashm e baddoor ho kya shaan hai rutba kya hai
Sadqe is rehm ke is saaya e daaman pe nisaar
apne bande ko museebat se bachaaya kya hai
