ARSH KI AQL DANG HAI
Arsh ki aql dang hai charkh meiñ aasmaan hai
Jaan e muraad ab kidhar haaye tera makaan hai
Bazm e sana e zulf meiñ meri uroos e fikr ko
Saari bahaare hasht khuld chhota sa itr daan hai
Arsh pe jaake murg e aql thak ke gira gash aagaya
Aur abhi manziloñ par-e pehla hi aastaan hai
Arsh pe taaza chhed chhaad farsh pe turfa dhoom dhaam
Kaan jidhar lagaaiye teri hi daastaan hai
Ek tere rukh ki raushni chain hai do jahaan ki
Ins ka uns usi se hai jaan ki wo hi jaan hai
Wo jo na the to kuchh na tha wo jo na hoñ to kuchh na ho
Jaan haiñ wo jahaan ki jaan hai to jahaan hai
Goad meiñ aalame shabaab haale shabaab kuchh na poochh
Gulbane baag e noor ki aur hi kuchh Uthaan hai
Tujh sa siyaah kaar kaun un sa Shafee’ hai kahaañ
Phir wo tujhi ko bhool jaayeiñ dil ye tera gumaan hai
Pesh e nazar wo nav bahaar sajde ko dil hai be qaraar
Rokiye sar ko rokiye haañ yahi imtehaan hai
Shaan e khuda na saath de un ke khiraam ka wo baaz
Sidrah se ta zameeñ jise narm si ek udaan hai
Baare jalaal Utha liya gar che kaleja shaq huwa
Yuñ to ye maahe sabz rang nazroñ meiñ dhaan paan hai
