MUSTAFA JAAN E REHMAT
Mustafa Jaan e Rehmat pe Laakhoñ Salaam
Sham’e Bazm e Hidaayat pe Laakhoñ Salaam
Mehr e charkhe nubuwwat pe raushan durood
Gul e baag e Risaalat pe Laakhoñ Salaam
Shab e Asra ke Doolha pe daaim Durood
Naushah-e Bazme Jannat pe Laakhoñ Salaam
Jis ke zere liwa Aadam o Mansiwa
Us Saza e Siyaadat pe Laakhoñ Salaam
Fat-he baabe Nubuwwat pe behad durood
Khatm e daur e Risaalat pe Laakhoñ Salaam
Hum Gariboñ ke Aaqa pe behad durood
Hum Faqeeroñ ki Sarwat pe Laakhoñ Salaam
Jis ke aage sar e sarwaraañ kham raheiñ
Us sar-e Taaj e Rif’at pe Laakhoñ Salaam
Jis ke Maathe Shafa’at ka sehra raha
Us Jabeen e Sa’aadat pe Laakhoñ Salaam
Jis taraf uth gayi dum meiñ dum aa gaya
Us Nigaah e Inaayat pe Laakhoñ Salaam
Jis se taareek dil jagmagaane lage
Us chamak wali rangat pe Laakhoñ Salaam
Wo Dahen jis ki har baat wahi e khuda
Chashma e Ilm o Hikmat pe Laakhoñ Salaam
Wo Zabaañ jis ko sab Kun ki Kunji kaheiñ
Us ki Naafiz Hukoomat pe Laakhoñ Salaam
Jis ki Taskeeñ se rote huwe hañs pade
Us Tabassum ki Aadat pe Laakhoñ Salaam
Jis ko baar e do Aalam ki parwaah nahiñ
Aise Baazu ki Quwwat pe Laakhoñ Salaam
Kul jahaañ milc aur jau ki roti giza
Us Shikam ki Qana’at pe Laakhoñ Salaam
Khaayi Qur’aañ ne Khaak e Guzar ki Qasam
Us kaf e paa ki Hurmat pe Laakhoñ Salaam
Jis suhaani ghadi chamka Taiba ka Chaañd
Us Dil Afroz Saa’at pe Laakhoñ Salaam
Gaus e Aazam Imamuttuqa Wannaqa
Jalwa e Shaan e Qudrat pe Laakhoñ Salaam
Ek mera hi Rehmat meiñ da’awa nahiñ
Shaah ki saari Ummat pe Laakhoñ Salaam
Kaash mehshar meiñ jab Un ki Aamad ho aur
Bhejeiñ sab Un ki Shaukat pe Laakhoñ Salaam
