DIL DARD SE BISMIL KI TARAH
Dil dard se bismil ki tarah loat rahaa ho
Seene pe tasalli ko tera haath dharaa ho
Kyuñ apni gali meiñ wo rawaadaar e sadaa ho
Jo bheek liye raahe gadaa dekh rahaa ho
Gar waqt e ajal sar teri chaukhat pe jhuka ho
Jitni ho qaza ek hi sajde meiñ adaa ho
Firdaus ke baagoñ se idhar mil nahi sakta
Jo koi Madina ke bayaabaañ meiñ guma ho
Dekha unheiñ mehshar meiñ to Rahmat ne pukaara
Aazaad hai jo aap ke daaman se bandha ho
Aata hai faqeeroñ pe unheiñ pyaar kuch aisa
Khud beek deiñ aur khud kaheiñ mangta ka bhalaa ho
Dhoondha hi kareiñ sadr e qayaamat ke sipaahi
Wo kis ko miley jo tere daaman meiñ chhupa ho
Jab dene ko bheek aaye sarey kuwe gadaayaañ
Lab par ye dua thi mere mangta ka bhalaa ho
