BAHAAR E MADINA
Ajab rang par hai bahar e Madina
Ke sab jannateiñ haiñ nisaar e Madina
Mubaarak rahe andaleebo tumheiñ gul
Hameiñ gul se behtar hai khaar e Madina
Meri khaak ya Rab na barbaad jaaye
Pasey marg kar de gubaar e Madina
Rag e gul ki jab naazuki dekhta hooñ
Mujhe yaad aate haiñ khaar e Madina
Malaaik lagaate haiñ aañkhoñ meiñ apni
Shab o roz khaake mazaar e Madina
Jidhar dekhiye baag e jannat khila hai
Nazar meiñ haiñ naqsh o nigaar e Madina
Raheiñ unke jalwe baseiñ unke jalwe
Mera dil baney yaadgaar e Madina
Do Aalam meiñ bat-ta hai Sadqa yahaañ ka
hamiñ ek nahiñ reza khwaar e Madina
Banaa aasmaañ manzil e ibn e Mariyam
Gaye Laa Makaañ Taajdaar e Madina
Muraad e dil e bulbule be nawa de
Khudaaya dikhaade bahaar e Madina
