KAREY CHAARAA SAAZI ZIYAARAT KISI KI

 

Karey chaaraa saazi ziyaarat kisi ki
Bhare zakhm dil ke malaahat kisi ki

 

Chamak kar ye kehti hai tal’at kisi ki
Ke deedar e haq hai ziyaarat kisi ki

 

Na rehti jo pardoñ meiñ soorat kisi ki
Na hoti kisi ko ziyaarat kisi ki

 

Ajab pyaari pyaari hai soorat kisi ki
Hameiñ kya khuda ko hai ulfat kisi ki

 

Kisi ko kisi se huwi hai na hogi
Khuda ko hai jitni mohabbat kisi ki

 

Rahe dil kisi ki mohabbat meiñ har dum
Rahe dil meiñ har dum mohabbat kisi ki

 

Khuda ka diya hai tere paas sab kuchh
Tere hote kya hum ko haajat kisi ki

 

Zamaane ki daulat nahiñ pas phir bhi
Zamaane meiñ bat-ti hai daulat kisi ki

 

Na pahuñche, kaheiñ aql e kul ke farishte
Khuda jaanta hai haqeeqat kisi ki

 

Qamar ek ishaare meiñ do tukde dekha
Zamaane pe raushan hai taaqat kisi ki

 

Hameeñ haiñ kisi ki shafa’at ki khaatir
Hamaari hi khaatir shafa’at kisi ki

 

Museebat zado shaad ho tum ke un se
Nahiñ dekhi jaati museebat kisi ki

 

Na pahuñcheñge jab tak gunehgaar unke
Na jaayegi jannat meiñ ummat kisi ki

 

Madina ka jungle ho aur hum hoñ zaahid
Nahi chahiye hum ko jannat kisi ki

 

Bharey jaayenge khuld meiñ ahle isyaañ
Na jaayegi khaali shafa’at kisi ki

 

Wahi sab ke maalik Unhiñ ka hai sab kuchh
Na Aasi kisi ke na Jannat kisi ki

 

Khuda se dua hai ke hangaam e rukhsat
Zabaan e HASAN par ho midhat kisi ki