DUM E IZTIRAAB MUJH KO

 

Dum e iztiraab mujh ko jo khayaal e yaar aaye
Mere dil meiñ chain aaye to usey qaraar aaye

 

Teri wehshatoñ se aye dil mujhe kyuñ na ‘aar aaye
Tu uhiñ se dur bhaage jinheiñ tujh pe pyaar aaye

 

Mere dil ko dard e ulfat wo sukoon de Ilaahi
Meri be qaraariyoñ ko na kabhi qaraar aaye

 

Mujhe naz’aa chain bakhshe mujhe maut zindagi de
Wo agar mere sirhaane damey ihtezaar aaye

 

Na habeeb se muhib ka kahiñ aisa pyaar dekha
Wo baney khuda ka pyaara tumheiñ jis pe pyaar aaye

 

Mujhe kya alam ho gam ka mujhe kya ho gam alam ka
Ke ilaaj gam alam ka mere gamgusaar aaye

 

Jo chaman banaaye ban ko jo jinaañ karey chaman ko
Mere baag meiñ Ilaahi kabhi wo bahaar aaye

 

Tere sadqe jaaye shaahaa Ye tera zaleel mangta
Tere dar pe bheek lene Sabhi shehr yaar aaye

 

Chamak uthe khaak e teera baney mehr zarra zarra
Mere chaand ki sawaari jo sar e mazaar aaye

 

Teri rehmatoñ se kam haiñ mere jurm is se zaaid
Na mujhe hisaab aaye na mujhe shumaar aaye

 

Tere sadqe tera sadqa hai wo shaandaar sadqa
Wo waqaar leke jaaye jo zaleelo khwaar aaye

 

Tere dar ke haiñ bhikaari miley khair dum qadam ki
Tera naam sunke daata hum ummeedwaar aaye

 

HASAN un ka naam lekar to pukaar dekh gam meiñ
Ke ye woh nahiñ jo gaafil pasey intezaar aaye