HABEEB E KHUDA KA NAZAARA
Habeeb e khuda ka nazaara karooñ maiñ
Dil o jaan un par nisaara karooñ maiñ
Teri kafsh e paa yuñ sañwaara karooñ maiñ
Ke palkoñ se us ko buhaara karooñ maiñ
Mujhe apni rehmat se tu apna karle
Siwa tere sab se kinaara karooñ maiñ
Maiñ kyuñ gair ki thokareiñ khaane jauñ
Tere dar se apna guzaara karooñ maiñ
Salaasil masaaib ke abru se kaato
Kahaan tak masaaib gawaara karooñ maiñ
Khudaara ab aao ke dum hai laboñ par
Dum-e waapsi to nazaara karooñ maiñ
Tere naam par sar ko qurbaan karke
Tere sar se sadqa utaara karooñ maiñ
Ye ek jaan kya hai agar hoñ karoroñ
Tere naam par sab ko waara karooñ maiñ
Mujhe haath aaye agar taaj e shaahi
Teri kafsh e pa par nisaara karooñ maiñ
Tera zikr lab par khuda dil ke andar
Yuñhi zindagaani guzaara karooñ maiñ
Dum e waapsi tak tere geet gaooñ
Muhammad Muhammad pukaara karooñ maiñ
Tere dar ke hote kahaañ jaooñ pyaare
Kahaañ apna daaman pasaara karooñ maiñ
Mera deen o imaañ farishte jo poochheiñ
Tumhari hi jaanib ishaara karooñ maiñ
Khuda aisi quwwat de mere qalam meiñ
Ke badmazhaboñ ko sudhaara karooñ maiñ
Jo ho qalb sona to ye hai suhaga
Teri yaad se dil nikhaara karooñ maiñ
Khuda ek par ho to ik par Muhammad
Agar qalb apna do paara karooñ maiñ